سنة الامتياز !🎓🌟

بعد خمس سنوات.. أهلًا بسنة الامتياز ..😍 

الفقرات:

أ. مقدمة عن سنة الامتياز

ب. النصائح والاستعداد

ج. الروتيشنز في سنة الامتياز

د. المتطلبات والبورتفوليو

مقدمة عن سنة الامتياز

سنة الامتياز اللي ننتظرها بتشوق من زمان.. ربما ندخلها وتوقعاتنا وأحلامنا كبيرة

بكل حماس للعالم الجديد اللي بنعيش فيه.

أولًا؛ سنة الامتياز سنة ممتعة وجميلة و هي بداية لدخولك عالم العمل و تكوين علاقاتك ومعرفة مَن في المجال، وأيضًا معرفة الأشكال المتنوعة من ممارسة الصيدلة. ممكن تشوف موظفين بمناصب ماتكون عارفها من قبل، تتعرف على حقيقة وواقعية الشغل .. تنقل تفكيرك وعقلك من أسلوب الدراسة إلى التطبيق في واقع الحياة.

ثانيًا؛ لا تنصدم!الحياة في المستشفى مختلفة تمامًا عن الحياة في الجامعة. 

إذا حسيت نفسك مو فاهم شي هذا عادي جدًا وطبيعي (كلنا مرينا فيه)، إذا شفت اللي درسته مختلف اختلاف شاسع عن اللي تشوفه في العمل هذا برضو طبيعي. لا تخاف! 

ثالثًا؛ الأقسام المختلفة في الصيدلية واللي ممكن تمر فيها وأهمها:

الصيدلية المركزية: تكون مركز قسم الشؤون الصيدلية وفيها مكتب مدير الصيدلية والسكرتارية ممكن تكون الصيدلية الداخلية أو الخارجية على حسب المستشفى.

الصيدلية الداخلية: فيها IV room، pharmacy lab، ومو شرط تشوفوهم موجودين في كل المستشفيات.

مركز معلومات الأدوية.

الصيدلية الخارجية (صيدلية العيادات الخارجية)

قسم التثقيف الدوائي

قسم التموين الطبي 

قسم السلامة الدوائية والجودة

قسم الصيدلة الإكلينيكية

و بنذكر المهام في الفقرات الجاية .. 

النصائح والاستعداد

كُن مستعد! ادخل هذه السنة بحماس ونشاط مع توقعات أقل (حتى لا تحبط).

يُفضل تسترجع المعلومات المهمة إذا لسه ما بدأت تذاكر لاختبار الهيئة (و غير متوقع أنك تبدأ قبل الدوام).

آخر أسبوع من الإجازة حلو أنك تزيح الغبار عن معلومات صار لها ٤ سنين مطروحة في خلف دماغك! 

كبداية أنصح بقراءة شابتر Hypertension & Diabetes لأن راح يمروا أدويتهم عليكم بشكل شبه يومي.

قراءة بسيطة لا داعِ للحفظ مجرد استرجاع لطريقة عمل الدواء و الأعراض الجانبية المشهورة و المرور على جرعاته.

بكذا تكون استرجعت بعض المعلومات و نشّطت دماغك اللي كان في سبات!

كتاب Pharmacotherapy أو Rx للتحضير اليومي و عن نفسي اشوف ٍRx مفيد أكثر في هذي المرحلة.

الاستعداد الآخر هو الاستعداد للدوام في مكان جديد..

أهم حاجة اصحى بدري و تناول فطورك قهوتك (بتمشي واجد اليوم!)

صل مبكرًا أو على الوقت مع باقي زملائك .. 

توقع أن أول محطة لك هي إدارة الشؤون الاكاديمية والتدريب، تروح للمسؤول و توقع بعض الأوراق ويوجهك لمكتب إصدار البطاقة (مهم جدًا تكون لابس البطاقة طول الوقت).

بعد ذلك تتوجه للصيدلية المركزية وتبحث عن مشرف التدريب في الصيدلية.

توقع منه يوجهك ويعرفك على المستشفى وأقسام الصيدلية والقوانين والأنظمة و يحدد مكان قسمك في التدريب.

وإذا ما ذكر لك شي منهم؛ اسأل.

الآن أنت متدرب في هذه المؤسسة! عرف بنفسك وين ما رحت اسمك و كونك طالب امتياز. كون لبق وبشوش وتعرف على الموجودين وطبيعة المكان بعدها ابدأ بالتفاعل معاهم.

نصيحة: لا تفتعل أي مشاكل لأن من هذه اللحظة كل فعل منك محسوب عليك واللي في الطرف الثاني من الدولة ممكن يسمع عنه! المجتمع ملموم والكل يعرف بعضه.

اعرف واجباتك وحقوقك لاتسمح لأحد يتعدى عليها بأسلوب مهني (وإذا اضطريت تنازل ليش لا؟)

والأهم اعرف دورك بالضبط! ايش مطلوب منك تسوي و المتوقع منك بكل مكان وقسم تروحه.

الروتيشنز في سنة الامتياز

الروتيشنز الموجودة في المستشفيات هي: الصيدلية الداخلية، الصيدلية الخارجية، مركز معلومات الأدوية، الكلنكال، سلامة الدواء، الجودة، سلاسل الإمداد. 

فيه كور روتيشن اللي ضروري تاخذها وفيه الاختياري حسب رغبتك (وغالبًا ماتقدر تختار برغبتك للأسف).

الكلنكال بيكون على حسب الصيادلة الإكلينيكيين الموجودين بالمستشفى بوقتها فأنت تقدر تسأل مسبقًا عن المستشفيات و الأقسام اللي فيها.

*مصادر تساعدك خلال مسيرتك في الامتياز*

UpToDate, Drugs.com, lexicomp, sanford guide, MDCal, MedMicrobes.

استعين بهم خلال اليوم للبحث السريع ونصيحة سجل كل اللي سويته وتعلمته خلال يومك في نوتز.

نتكلم شوي عن الأعمال المعتادة في كل روتيشن..

*الأفضل هو أنك تبدأ في الصيدلية الداخلية أو حتى الخارجية أو مركز المعلومات.*

في الصيدلية الداخلية:

أولًا تعرف على تقسيم الصيدلية و تعرف على الأدوية الموجودة.

غالبًا راح تبدأ في جهة التحضير مع التكنشنز وهو أنك تاخذ الليبل من الفارمسست وتجهز الأدوية للمرضى في القسم الواحد (هنا ركز على أسماء الأدوية وجرعاتها وكم ينصرف منها و الأدوية اللي تنصرف مع بعض و اعرف استخداماتها بالجرعات).

من الجهة الثانية حاول أنك تجلس مع الفارمسست على الكمبيوتر وتشوفه وهو يصرف الأدوية (لاحظ النقاط اللي يسويها و اللي يتأكد منها قبل صرف الوصفة).

خلال هذا الروتيشن اعرف الأدوية الموجودة بالثلاجة وكم المدة اللي تظل برا الثلاجة، تعرّف على الأدوية المركزية و استخدامها.

في الصيدلية الخارجية:

الصيدلية الخارجية أغلبها تحضير الوصفات (ولكن بشكل سريع سريع!) نفس الصيدلية الداخلية تعرف على التقسيم و الأدوية كمية الصرف والمدة اللي يغطيها.

كيف تحضر أدوية hazard ؟ اسأل عن طريقتهم بالتحضير والأدوات اللي يستخدموها (ممكن يكون طبق مخصص لعد الحبوب و يتم تعقيمه بعد الاستخدام).

راقب الصيدلي وقت صرفه الأدوية للمريض و التعليمات اللي يقولها له (وسجل عندك بالنوت عشان تحفظ!) ومع الوقت جرّب أنك تصرف بنفسك تحت إشراف الصيدلي.

في الصيدليتين اسأل و اسأل واجد هذي فرصتك لا تضيع يوم بدون ماتعلم حاجة جديدة.

في مركز معلومات الأدوية:

في هذا الروتيشن مفروض تتعلم كيفية البحث عن معلومة (سؤال يصلك من دكتور أو صيدلي أو شخص) وين تبحث؟ كيف تبدأ تبحث؟ 

أغلب الروتيشن بيكون تلقي اسئلة و تجاوبها (من تجربتي فقط ولا أعلم عن تجارب الآخرين).

في قسم الكلنكال:

هنا نجي لأصعب جزء في الامتياز (وأفضل آنك تدخله بعدما تخلص الأقسام المذكورة فوق).

الكلنكال حاجة جديدة على كل المتدربين وتختلف عن اللي تعلمناه وشفناه بالجامعة.

عشان تبدأ كويس لازم تكون مذاكر حتى لو استرجاع لأهم المعلومات .. 

والطريقة أنك كل يوم تراجع موضوع على حسب الروتيشن اللي أنت فيه تحدد المواضيع من الأكثر تعرضًا للأقل..

أكرر أعرف المطلوب منك! 

كل يوم اسأل مشرفك وش بنسوي اليوم؟ فيه راوند؟ خذ أرقام ملفات المرضى الجدد وافتح الملف و راجع الحالات اللي تحدّد لك قبل ماتروح الراوند.

بتكلم عن الروتيشن اللي دخلتها وجربتها وهم الانترنال مدسن و الانفكشوس..

بيكون في فرق بسيط بين طبيعة الشغل بين الاثنين؛

الانفكشوس ID : 

تركيزك على ٣ أشياء مهمة: الباثوجين (تتابع الكلشر و نتيجتها تشوف البكتيريا و السنستفتي للأدوية)، الأدوية/المضادات وش الأدوية اللي ماشي عليها و اللي كان ماخذها من قبل و على حسب المرض بيفرق اهتمامنا بالمدة اللي نرجع فيها للأدوية ونعتبرها، الشيء الثالث وهو البيشنت؛ وش أعراضه؟ وش الأمراض الثانية عنده؟ تراقب حالة الكلى بشكل يومي وتحسب له CrCl or GFR.

راجع تقسيم الباكتيريا (أنصح بكتاب Antibiotics simplified) 

coverage of antibiotics إذا حفظتهم فأنت قطعت شوط طويل. بعدها ركز على الأمراض كل يوم اقرأ موضوع بداية من الأهم و حالة مريضك.

أهم المواضيع اللي تعرفها وتواجهها بشكل كبير:

pneumonia (community vs hospital vs aspiration)

UTI

meningitis 

diabetic foot (osteomyelitis)

 

ففي هذا القسم بيكون ترتيب يومك 

١. تراجع حالات المرضى ٢. تروح راوند ٣. تكتب سوب نوتز وتسوي دسكشن مع البرسبتور.

Internal medicine IM:

روتيشن متوسع أكثر وفيه أمراض واجد وممكن تحس بالتشتت فالأفضل أنك لما تمسك كيس وتفتح ملف المريض تراجع النوت progress note تعرف المريض هذا متى جا وليش جا؟ وش اللي يشتكي منه أول ما جا المستشفى؟ وش أعراضه؟ الأمراض اللي فيه؟ الأدوية اللي يستخدمها بالمنزل؟ 

تفتح على الأدوية في النظام وتشوف وش مدخل له وش يستخدم حاليًا باسم الدواء والجرعة والروت و المدة. 

وشيّك إذا فيه Drug-Drug interaction  برضو. 

راجع التحاليل و ركز على الرينال فنكشن واحسب CrCl وتأكد أن جرعات الأدوية مناسبة. 

افهم التحاليل اللي تدلك على حالة المريض تحسن/تسوء؟ وش اللاب تستر اللي تكتبها في السوب نوت؟ طبعًا على حسب المرض بتسجل التحاليل المهمة لمتابعتها معاه.

أهم المواضيع اللي تحتاج تعرفها وبالترتيب:

Diabetes

Hypertension

Thyroid diseases

Sickle cell disease

Heart failure

pneumonia 

ترتيب اليوم نفس ما ذكرت فوق ١. تراجع حالات المرضى ٢. تروح راوند ٣. تكتب سوب نوتز وتسوي دسكشن مع البرسبتور.

نصيحة: اهتم أنك تفهم في هذا القسم وتعرف الأسباب وراء كل خطوة يسوونها.
اقرأ المواضيع من Rx prep و ارجع للقايدلاين وشوف treatments.
إذا طلب منك معلومة ابحث عنها من مصدر موثوق (مقالات أبحاث، لكسي، مايكرومدكس) واحذر أنك تقول مصدري UpToDate لأنه لا يعتبر مصدر أساسي!

 المتطلبات والبورتفوليو

SOAP note, case presentation, topic presentation, journal club

أول ماتمسك حالة خلي عندك patient sheet templet حتى تعبي فيها المعلومات 

الشيت تختلف على حسب القسم واحتياج المعلومات؛ مثال:

بعدما تقرأ الكيس وتفهمها وتكون مجمع المعلومات المهمة بعدها راح يُطلب منك عرض الحالة أو عمل سوب نوت

أول سوي السوب نوت عشان تقدر تعرض الكيس بشكل مرتب وأسهل..

SOAP Note جدًا مهم تعرف تكتب السوب نوت في كل كلنكال روتيشن، واحنا عارفين أنها عبارة عن:

S: subjective

O: objective

A: assessment

P: plan

أما كيف تكتبها بالضبط؟

امشي على هذا النمط أدناه:

Background

CC:

HPI:

PMH:

 

Medications:

 

Patient demographic

Wt:   Ht:  BMI: 

 

Objective

 

T:      BP:      PR:      RR:      O₂%:

 

Physical examination:

 

Labs:

 

Microbiology:

 

Assessment

 

 

Plan

وهذا مثال للسوب على إحدى المرضى:

من الأشياء الثانية اللي مطلوبة عليكم عمل برزنتيشن (topic presentation) وهذا معتاد عليه مثل اللي نسويه في الجامعة.. اختار موضوع مناسب بحيث أنه مرض واجهته في الروتيشن أو موضوع مهم ما تطرقت له في الجامعة؛ وحاول قد ماتقدر تذكر معلومات عملية تفيد المستمع في عمله في المستشفى.

بالنسبة إلى الجورنال كلوب ممكن يكون موضوع جديد عند البعض و هو موضوع طويل بتكلم عنه لحاله في منشور آخر بإذن الله..

آخر حاجة مطلوبة منك وهي مطلوبة من الكلية Portfolio تسلمها نهاية الروتيشن أو مثل ما تحدد لك الكلية.

شنو هو البورتفوليو؟

البورتفوليو هو أنك تكتب كل شي سويته وانجزته في الروتيشن (يعني كأنك تكتب مذكرات يومية).

البورتفوليو تسويه بشكل مرتب ومنظم و الجامعة ترسل لك نموذج لطريقته ولكن هذي الأقسام اللي بتكتبها فيه:

CV

student objective

student schedule

rotation specific information

assignments

activities

ابدعوا في كتابته بالطريقة اللي تحبوها لكن النقاط المهمة هي:

كل بورتفوليو يكون بدايته your CV بعدها صفحة فيها أهدافك يعني وش هدفك في الانترنشب أو الروتيشن هذا؟ حط ٤ أو ٥ أهداف مثلًا بيكون كافي. 

الصفحة اللي بعدها تكتب جدول الروتيشنز اللي أخذتها في المستشفى الحالي و السابق وهنا تحط جدول مرتب فيه اسم الروتيشن و التاريخ والمكان اللي اخذته فيه (اسم المستشفى أو الصيدلية إذا كانت صيدلية مجتمع)

بعدها تجي للروتيشن اللي أنت فيه وتكتب إنجازاتك والأشياء اللي تعلمتها فيه؟ كل يوم وش كنت تسوي في الروتيشن؟ وش المواضيع اللي تعلمتها؟ حط أمثلة عليها. مثل انترفنشن أنت سويته أو موضوع تناقشت فيه.

بعدها إذا البرسبتور عطاك اسايمنتس ارفق صور لهم و كذلك الاكتفتيز اللي سويتها.

 هذا مثال على البورتفوليو حتى تشوفوه (وليس للنسخ)

نموذج portfolio

بإذن الله هذه أهم المعلومات اللي تحتاجوا تعرفوها قبل بداية الروتيشن حتى تتأقلموا على الوضع بشكل أسهل؛ واستقبل الأسئلة والاستفسارات عن طريق حسابي في تويتر @R_drla وفي الخدمة دائمًا ..

دمتم بوِد..